Psa 112 | MMX | STEP | Ata emi asu mi Leeme Silok. Luvukat ti mo laradi i lok ngangao at Leeme Silok, la i lok momo aleng ting tonga res at levelinga at ne Moroa.

Psalms 112

Lomomo at Laradi Nunuan

1 Ata emi asu mi Leeme Silok.

Luvukat ti mo laradi i lok ngangao at Leeme Silok, la i lok momo aleng ting tonga res at levelinga at ne Moroa. 2 Laxamdak mi laxaalik teren dinaba ruuna levenasen silok go at lenep kangka ramtaba la Leeme Silok naba lox anarong livipisik li ren. 3 Laxankoenasun teren dinaba ngasang kobot at laxampanga solo la dinap novos aleng; la neni noxok pakes bok ba ti tempanga.

4 Limixin avukat di lok ngan laxasep ik lok kantubu at lamain; la dik lox asuusu lebelemumu, loklok anare, la loklok ik mokso. 5 Luvukat nabat pas ti mo lara im taba gamasa, la ik lok momo mun do limixin dinang sing panga i, la ik lok mo lugugu pilas teren mi lomokmokso. 6 Lugugu at mo laradi avukat noxo subu, la limixin bok di noxo domampe i.

7 Neni noxo marat ba at tevelinga mumu tumumuat boro vetpes neni i ronga i, mila lunnunu ren i lolos la i nuunu saga at Leeme Silok. 8 Leveeve ren ira xus pam, la neni kopmen na marat at tempanga, i nuunu do ne Moroa naba sak tup mi lavamunepen teren. 9 Neni im taba leventamtaba solo mi lebelemulus ti limixin banbalo; la amisik ik lox asuusu labalamu ren ti limixin; la naba ruuna laasen silok la limixin diba xip aurut laasen teren. 10 La limixin kapmek diba ven i la dina musak, la dinabak milik angtungun tin; ketla levenasen silok atdi ba si aleng tino la mo levendoxoma agagas atdi kopmen noxo soorun.